المواد الشديدة السمية لاطفال

  • 15 Feb 2021
  • 0 التعليقات
  • المواد السامة والجرعة السامة للأدوية والانتحار

المواد الشديدة السمية للأطفال والتى قد

تؤدى إلى الوفاة بجرعات قليلة ودى مشهورة فى الأطفال :-

 

ب ONE PILL CAN KILL بمعنى إن قرص واحد قد يكون قاتل لطفل وزنه 10 كيلو :

 

1- أدوية الضغط زى الكونكور(بيسوبرولول) و الإنديرال(بروبرانولول) و دول بينزلوا الضغط و ضربات القلب و السكر بالدم والإييبيلات(نيفيديبين) و الأيسوبتين(ڤيراباميل) ودول بيسببوا هبوط حاد فى الضغط والدورة الدموية .

.

2- أدوية السكر زى الأماريل(جليميبرايد) و الديامايكرون(جليكلازايد) ودى موجودة برضه فى بيوت كتيرة بسبب انتشار مرض السكر من النوع التانى ودى بتعمل هبوط فى نسبة السكر بالدم و غيبوبة و تشنجات وخطورة الأدوية دى إن انخفاض السكر ممكن يحصل متأخر فى أول 24 ساعة عشان كده الطفل لازم يتحجز حتى لو مفيش أعراض و سكره كويس فى البداية لمتابعة السكر كل ساعة إلى ساعتين .

3- الأدوية المضادة للاكتئاب Tricyclic antidepressant زى الأنافرانيل (كلوميبرامين) و التوفرانيل(ايميبرامين) والتريبتيزول(اميتربتيلين) ودى طبعا بتستخدم لعلاج الاكتئاب بس ليها استخدامات تانية فممكن تكون موجودة فى البيت و منعرفش فبتستخدم فى علاج بعض حالات التبول اللارإدى فى الأطفال و لعلاج الصداع النصفى والتسمم بالأدوية دى فى الأطفال ممكن يسبب إختلال فى ضربات القلب و غيبوبة و تشنجات و هبوط فى الضغط .

.

4- الأدوية المضادة للذهان اللى بتستخدم لعلاج أمراض نفسية زى الفصام .

.

5- الأدوية المضادة للملاريا زى الكلوروكين معظم الحالات بتكون جاية من السفر من الخارج لكن الأدوية دى ليها إستخدامات تانية فى علاج بعض أمراض المناعة الذاتية زى الذئبة الحمراء و الروماتويد .

.

6- الأدوية مسكنات الألم القوية والتي يصل استخدامها لحد الإدمان ومنها الترامادول اللي ممكن يعمل غيبوبة و فشل كلوى و توقف بالتنفس .

.

7- ومن الأعشاب ما قتل مادة الكامفور Camphor ودى مادة عشبية بتستخدم فى الكريمات المسكنة للألم زى آلام الظهر و العضلات و طبعا مشهورة جدا و موجودة فى كل البيوت كريم زى الجازون أو مووف مساج وده ممكن بكميات بسيطة يعمل ترجيع و اسهال و غيبوبة و تشنجات .

.

8- المبيدات الحشرية بتختلف درجة السمية على حسب النوع و الكمية و طريقة التعرض لكن فى بعض الأنواع شديدة السمية بكميات بسيطة وممكن تؤدى إلى الوفاة .

.

9- مادة البنزوكين Benzocaine و هى مادة مخدرة بتستخدم فى جيل تخفيف آلام الأسنان زى الدنتوكالم و الدنتوكين الشهيرين لتخفيف آلام ظهور الأسنان عند الأطفال ممكن تسبب حالة نادرة اسمها Methemoglobinemia خاصة عند الأطفال أقل من سنة و المصابين بأنيميا الفول و أعراضها زرقة ونقص بأكسجين الدم و صعوبة بالتنفس و تشنجات ودمهم بيقى غامق زى الشيكولاتة .

.

10- أخيرا فى حاجتين ممكن يكونوا موجودين فى أى بيت و فى متناول الأطفال و إحنا مش عارفين خطورتهم وإنهم ممكن يسببوا الوفاة :

.

أولا صبغة الشعر و ما أدراك ما صبغة الشعر مادة قاتلة تسبب تورم فى اللسان و الحنجرة و ضيق فى مجرى التنفس و فشل كلوى حاد و تشنجات ومشهورة فى بعض الأماكن باستخدامها للانتحار.

.

ثانيا بطارية الليثيوم و دى بتبقى موجودة فى بعض الأجهزة و ألعاب الأطفال و سهل الطفل يطلعها و يبلعها و دى خطيرة جدا لأنها ممكن فى خلال ساعتين تسبب حرق و ثقب فى بطانة المرىء حيث تصنع دائرة كهربائية فى وجود اللعاب وتبدأ البطارية عملها حيث يصدر منها مادة قلوية تتسبب في تكوين صودا كاوية تؤدى إلى حدوث تآكل في جدار المرىء وحدوث ثقب والتهاب حاد بالصدر و تسرب للهواء حول الرئة وإذا واجهت البطارية طريقا مختلفا، حينئذ يمكنها أن تحدث حرقا في الأورطى والأوعية الدموية الرئيسية، وتوجد حالات سجلت ينزف فيها الطفل حتى الوفاة وفى كتير من الحالات بيحصل معاها ضيق فى المرىء أو ناسور بين المرىء و القصبة الهوائية و تحتاج عمليات لتوسيع المرىء أو استئصال جزء منه .

التصرف فى حالة بلع الطفل لبطارية ليثيوم التوجه للمستشفى مباشرة لعمل أشعة و فى حالة وجودها فى المرىء لازم تتشال فورا بالمنظار .

وأخيرا في حالة بلع الطفل لأي دواء يفضل التوجه لأقرب مركز سموم سواء بجامعة عين شمس او القاهرة

مشاركة المحتوى

عن المؤلف

طبيب هايدي دهمش

حاصلة على بكالوريوس الطب والجراحة جامعة عين شمس٢٠٠٨ ‎حاصلة على دورة طب الأسرة بجامعة عين شمس٢٠٠٩ ‎عملت بأول وحدة صحية لطب الاسرة بالفيوم ٢٠٠٩-٢٠١٠ ‎عملت طبيب عام بوزارة الداخلية ‎حاصلةعلى دورة مكافحة العدوى بوزارة الداخلية٢٠١٠حتى الان ‎حاصلة على ترخيص الهيئة السعودية للطب العام٢.١٣ ‎حاصلة على دورة الانعاش القلبي والرئوي بالهيئة السعودية ‎عملت بعدة مستشفيات بالمملكة العربية السعودية كمقيمة نساء وتوليد ‎حاصلة على دورة في التجميل والليزر وحقن الفيلروالبوتكس ٢٠١٨

التعليقات (0)

اترك تعليق